Антиоксидантите од свежото овошје би можеле да помогнат во намалувањето на штетните ефекти од загадувањето на воздухот, сугерираат научниците.
Нова студија покажа дека јадењето повеќе овошје може да го намали негативното влијание на загадувањето на воздухот врз белите дробови. Според истражувачите на Универзитетот во Лестер, ова може да се должи на природните антиоксиданти што се наоѓаат во овошјето.
Ефектот бил особено изразен кај жените кои јаделе четири или повеќе порции овошје дневно, според студија спроведена на повеќе од 200.000 луѓе. Научниците забележале дека мажите генерално јадат помалку овошје од жените, што би можело да објасни зошто заштитниот ефект е забележан кај жените.
Коментирајќи ги резултатите од студијата, Сара Слит, извршен директор на добротворната организација Asthma + Lung UK, рекла: „Знаеме дека исхраната богата со овошје ја поддржува функцијата на белите дробови, но оваа студија е возбудлив чекор напред бидејќи покажува дека овошјето може да помогне и во неутрализирање на ефектите од загадувањето на воздухот врз белите дробови“.
– Овошјето и зеленчукот, особено оние богати со витамини Ц и К, можат значително да помогнат во одржувањето на здравјето на белите дробови. Иако консумирањето овошје не е замена за препишани лекови, уживањето во овошје како дел од балансирана исхрана се чини дека им помага на белите дробови подобро да се справат со надворешните стресори како што е загадувањето на воздухот.
За да ја истражат врската помеѓу здравата исхрана и подобрата функција на белите дробови, научниците од Универзитетот во Лестер анализирале податоци од UK Biobank на 207.421 лица.
Истражувачите ги споредиле навиките во исхраната на испитаниците – вклучувајќи го внесувањето овошје, зеленчук и интегрални житарки – со функцијата на белите дробови, или FEV1, количината на воздух што едно лице може да го издиши за една секунда.
Загадувањето на воздухот било мерено како концентрација на фини честички (PM2,5), кои се испуштаат во воздухот од автомобили, фабрики и други извори.
Тимот открил дека кај луѓето кои не консумирале многу овошје, FEV1 се намалил за 78,1 мл за секои пет микрограми PM2,5 на кубен метар воздух. Кај жените кои консумирале многу овошје, намалувањето било 57,5 мл.
Пимпика Каевсри, докторантка на Центарот за здравје на животната средина и одржливост на Универзитетот во Лестер, ги презентирала резултатите на Конгресот на Европското респираторно друштво во Амстердам.
– Нашата студија потврди дека здравата исхрана е поврзана со подобра функција на белите дробови кај мажите и жените, без оглед на изложеноста на загадување на воздухот. Жените кои консумирале четири или повеќе порции овошје дневно имале помало опаѓање на функцијата на белите дробови поврзано со загадувањето на воздухот во споредба со оние кои јаделе помалку овошје. Ова делумно може да се објасни со антиоксидантите и антиинфламаторните соединенија што природно се наоѓаат во овошјето. Овие соединенија можат да го намалат оксидативниот стрес и воспалението предизвикано од фини честички, потенцијално намалувајќи ги штетните ефекти од загадувањето на воздухот врз белите дробови.
Професорката Сара Де Матеис, претседателка на експертската група за професионално и еколошко здравје на Европското респираторно здружение, изјавила дека студијата „ги потврдува потенцијалните придобивки од здравата исхрана за респираторното здравје, особено исхраната богата со свежо овошје“.
Сепак, таа предупредила дека пристапот до здрава исхрана не е рамномерно распределен низ целата популација, па дури и ако студијата го земе предвид социоекономскиот статус, овој ефект не може целосно да се исклучи.
Професорката Де Матеис додала дека здравата исхрана богата со храна од растително потекло треба да се промовира меѓу населението почнувајќи од основно училиште.