За готвачите постојано го употребуваме изразот, кулинарски уметници, ама кога ќе видите што сѐ може да направи една сликарка во својата кујна, ќе сфатите кој е вистински уметник, во ателје или во кујна, сеедно
Нашата домаќинка е сликарката Симонида Филипова Китановска, слободен уметник, во последниве години од нејзиното творештво речиси исклучиво посветена на акварелите. Постојано е некаде низ светот, кој ја препознава како авторка со посебен придонес за современата меѓународна ликовна сцена.
Нејзината инспирација е безгранична и не завршува во преубавата градина полна со растенија, дрвја, цвеќиња и птици, ниту пак се пресликува само на акварелна хартија, со боја и четка.
Да, да, инспирацијата не ја остава пред вратата и во ателјето, туку е подеднакво присутна и во нејзината кујна, само наместо бои и четки, тука „летаат“ тавчиња, тенџериња и други кујнски алатки. А што сѐ излегува од таму, знаат само оние кои имале чест да се најдат на трпезата приготвена за различни пригоди, по различни поводи или само онака, дека ѝ е ќеф.
Овојпат, за нејзиниот пролетен роденден трпезата е поставена под крошната на дрвјата во преубавата градина, а ѕвезда на масата се – спринг ролс цвеќенцата.
![](https://artkujna.mk/wp-content/uploads/2024/04/1-461x1024.jpg)
![](https://artkujna.mk/wp-content/uploads/2024/04/2-461x1024.jpg)
Кога ќе ги видите наредени на чинијата, не сте воопшто сигурни дали се за украс или (дај Боже) за јадење. И нема да знаете што попрво да правите, да ги сликате, да прашувате дали се за јадење или за украс или храбро да си ја наполните чинијата и едноставно, да грицнете малку.
И да, за јадење се и се навистина вкусни исто толку колку што се и убави за око.
Ако ја прашате како се прават, звучи како да се направени со леснотија. И веројатно е така за неа, ама не за секој, па ако немате нерви и уште поважно, ако немате „фат“, ич не се заморувајте.
Во спротивно, обидете се: земете оризови кори, исечете ги во облик на цвет и залепете ги една со друга со помош на сварен ориз… „Чрврчнете ги“ во врел зејтин неколку секунди и наредете ги на чинијата.
![](https://artkujna.mk/wp-content/uploads/2024/04/99926912-115b-4f32-bfc3-1b22c7164f12.jpg)
![](https://artkujna.mk/wp-content/uploads/2024/04/103bdeb4-5aa8-498a-a31b-16cc496a578b.jpg)
![](https://artkujna.mk/wp-content/uploads/2024/04/12920be2-d124-4318-aa2b-5aebede3f90f.jpg)
Освен преубавите цветови, софрата ја красат уште многу деликатеси, особено привлечни, ако сте вегетаријанец. Превкусни бургери од црвена леќа и полнети триаголници со зеленчук, во комбинација со вкусни сосови со домашни свежи билки од дворот, ориз со ракчиња, зелени салати, грицки и портокали, ама и крцкави крилца за оние кои сакаат да си мезат со ладно пиво, наместо да уживаат со розево вино.
![](https://artkujna.mk/wp-content/uploads/2024/04/a8d9cbff-c1e4-4400-937d-3a1c14bcfe1e-1.jpg)
![](https://artkujna.mk/wp-content/uploads/2024/04/61ef61bf-55bd-47a9-883d-75fbd23be324.jpg)
![](https://artkujna.mk/wp-content/uploads/2024/04/695ef16b-94d3-4aa3-aa3a-2a64d6727658.jpg)
И така, таман ќе помислите дека е време да станете и да си одите, ќе сфатите дека не сте ја виделе славеничката во последните 15 минути. Ја барате да се поздравите и ви велат: Симонида е во кујна, ја прави тортата. Молам?!
Нормално, се враќате назад!
Наскоро, пристигнува Симонида со старата добра америчка тава во која е роденденскиот колач стокмен со брзина на светлината, а со изглед и вкус од милион долари.
Значи, не се вели залудно „како јаготка на шлагот“….
Наскоро ќе ги добиеме и рецептите за некои од овие убавини и ќе ги споделиме со вас. И верувајте, сѐ изгледаше многу поубаво отколку на нашиве фотографии.
![](https://artkujna.mk/wp-content/uploads/2024/04/e2e3441a-c9e3-4080-8a00-cfc3eeff332b.jpg)
![](https://artkujna.mk/wp-content/uploads/2024/04/c3cefa67-5503-47e5-9ecf-ebda4a90a889-1.jpg)
![](https://artkujna.mk/wp-content/uploads/2024/04/9a2f41dd-b122-4b9e-95b0-f3d6aa0b4057.jpg)