Крцкави однадвор, сочни и кремасти одвнатре, со различни вкусови, еклерите се уште еден заштитен знак на француското слаткарство! Имаме и одличен рецепт
Eклерите потекнуваат од Франција,од 19 век, а самиот збор „éclair“ на француски значи „блесок на молња“, што ја опишува брзината со која исчезнувале, односно, се трошеле овие слатки колачи.
Се верува дека еклерите ги измислил познатиот француски слаткар Мари-Антоан Карем, кој бил кулинарски пионер во 19 век. Тој бил особено познат по неговите детални и иновативни производи од тесто. Се смета дека тој го создал еклерот како варијација на неговиот претходен рецепт за „pain a la duchesse“, вид лиснато тесто исполнето со крем.
Верзијата на еклерот на Карем има шуплива, издолжена школка од тесто која е исполнета со крем со вкус на ванила, чоколадо или кафе. Тестото е направено од мешавина од брашно, путер, вода и јајца, која се дуе за време на печењето, давајќи му лесна и воздушеста текстура.
Еклерите брзо се здобиле со популарност во Франција и станале главен производ во француските слаткарници, познати по нивните деликатни и исклучителни вкусови. Биле омилени меѓу француската аристократија и станале симбол на елеганција и софистицираност.
Креативност во вкусови и декорација
Со текот на времето, еклерот еволуирал и се појавиле различни варијации, вклучувајќи различни вкусови, форми и декорации. Денес, можете да најдете широк спектар на вкусови и стилови на еклер, од традиционални вкусови на ванила и чоколада до покреативни комбинации.
Од што се состои еклерот?
Еклерот се состои од лесно тесто кое се обликува во долгнавеста форма и потоа се пече. Резултатот е нежна, златна школка со крцкава текстура.
Различни вкусови
Шупливото печиво се полни со кремаст фил. Најчесто тоа е крем со вкус на ванила, чоколадо, кафе или овошје. Филот обично се прави од комбинација на јајца, млеко и шеќер за да се создаде крем кој прави контраст на крцкавото тесто. Покрај класичните вкусови на ванила или чоколадо, можностите се бесконечни, често се комбинираат малини и ф’стаци, а популарни се и вкусовите на мача или лаванда.
Одозгора еклерот често е украсен со сјаен слој чоколадна глазура или шеќер во прав.
Еклерот е омилено слатко печиво ширум светот, а многу земји го вклучија ова класично француско уживање во нивните асортимани на десерти, со што ѝ оддадоа почит на извонредната уметност на француското печиво.
Рецепт за еклери:
За тестото:
250 мл вода
125 гр путер
1 лажица шеќер
150 гр брашно (остро)
4 јајца
прстофат сол
За филот:
500 мл млеко
малку екстракт од ванила
4 жолчки
100 гр шеќер
35 г густин
250 мл слатка павлака
За преливот:
60 гр темно чоколадо
50 мл слатка павлака
Приготвување на тестото:
Истурете вода во тенџере, потоа додадете шеќер, сол и путер и оставете да зоврие. Потоа додадете брашно во смесата и мешајте една минута на рингла. Во изладеното тесто додавајте по едно јајце и матете со миксер додека не добиете компактна смеса. Добиеното тесто ставете го во слаткарски шприц или кесичка на која ќе направите отвор, а потоа полнете и истискувајте го тестото со големина на орев на плех обложен со хартија за печење.
Се пече во загреана рерна 20 минути на 190 степени.
Приготвување на филот:
Во млекото додадете арома на ванила, па оставете да зоврие. Во меѓувреме изматете ги жолчките со шеќер и додадете го густинот, па сè убаво измешајте. Во смесата истурете малку варено млеко и убаво измешајте, додека не исчезнат грутките, а потоа додадете го остатокот од млекото. Повторно енергично промешајте и вратете ја смесата во тенџерето во кое се вареше млекото, па мешајте на тивок оган додека не се згусне филот.
Филот префрлете го во друг сад и покријте го со пластична фолија за да не се направи коричка. Во изладениот фил додадете ја изматената слатка павлака, па убаво измешајте додека да се соедини.
Наполнете ги изладените еклери со подготвениот фил со помошна шприц. Можете да ги преполовите по должина или да направите дупка низ која ќе го ставате филот – изборот е ваш.
Приготвување на преливот:
Загрејте ја слатката павлака (погрижете се да не зоврие), а потоа додадете го ситно искршеното чоколадо. Оставете ја смесата малку да се излади, а кога ќе стане млака потопете ги во неа горните делови од еклерите.
Еклерите можете да ги декорирате не само со чоколадо, туку и со шеќер, мелени ореви, прелив од карамела, рендана кора од лимон…