Мафини што изгледаат како кралици: Кога од обичен рецепт ќе направиш нова ѕвезда

369

Кај неа дури и обичните мафини изгледаат кралски, а кремот со кој ги украсува прават да личат на мали кремасти тортички и е посебен деликатес. Да, станува збор за десерт од кујната на шеф Маре Јаневска

Откако со семејството се пресели во Германија, шеф Маре Јаневска ја допрати дотаму и добриот глас кој се проширил помеѓу семејствата од сите држави на поранешна Југославија кои живеат таму, но и меѓу локалното население. Таа веќе му излегла во пресрет на едно хрватско семејство на кое за крштевка им приготвила прекрасна бела торта и мали тортички со крем од ванила, поточно, мафини престорени во кралици.

Нормално, луѓето биле воодушевени.

Ние го добивме рецептот за мафините. Ќе видите, не е воопшто тежок, само треба некому да му текне дека може да се исфилуваат со крем кој обично се користи за торти и имате вистинска ѕвезда на трпезата.

Состојки:

За мафините:

150 г путер на собна температура

150 г шеќер

1 ванилин шеќер

1 прашок за пециво

2 јајца

150 г брашно

1 лажица павлака

За кремот:

250 г омекнат путер

200 г шеќер во прав

ванила паста

2 лажици крем сирење на собна температура

2-3 лажици павлака.

Приготвување:

Путерот, шеќерот и ванилиниот шеќер се матат, потоа се додаваат јајцата, се мати уште кратко, па се додаваат брашното, пецивото и павлаката. Се поврзува сѐ заедно, се полнат корпичките за мафини до пола и се печат на 200 степени околу 15 минути.

Состојките за кремот се матат за да се добие кремаста смеса која потоа се става во шприц и се филуваат изладените мафини.