Сигурно често се прашувате дали е во ред да се јаде руската или француската салата која сте ја направиле за празниците во деновите потоа и колку долго можете да ја консумирате. И која е всушност разликата помеѓу овие две салати?
Во овој период од годината ретко кој не прави француска или руска салата во поголеми количини кои потоа се дојадуваат со денови. Но колку денови е најдобро да се чуваат, на кој начин, како и која е разликата помеѓу овие две салати прочитајте подолу во текстот.
Руската или француската салата се незаменлива состојка на празничните трпези, лесно се подготвуваат, се чуваат во фрижидер, калорични се и одлично се комбинираат со многу главни јадења. Руската салата се прави на ист начин како и француската, но со додаток на месо, кое е главната состојка која создава разлика во вкусот и текстурата.
И двете салати се комбинација од повеќе видови зеленчук, мајонез, сенф и кисели краставички, а разликата меѓу руската и француската салата е што во првата се става месо исечкано на коцки (бело месо, шунка…), а во втората само зеленчук и варени јајца кои се комбинираат со мајонез и сенф.
За да ја направите најоригиналната руска салата, треба да користите бело пилешко.
Двата вида салата потекнуваат од популарната Оливиерсалат, која ја официјализирал Лусиен Оливие, познат готвач со француско-белгиско потекло, уште во царска Русија. Во 1860 година во Москва ресторанот „Ермитаж“, меѓу останатите француски специјалитети, ја имал и оваа салата која московјаните ја обожавале. Рецептот за сосот бил посебен и строго чуван. На крајот на 19 век, руски готвач кој работел во ресторанот на Оливие, го ископирал рецептот кој се чувал со години и слична верзија послужил во друг ресторан, наречен „Граѓанска“. Подоцна станале познати како руска и француска салата, со тоа што во француската салата не се ставало месо.
Инаку, овие салати најдобро е да се чуваат во сад со капак и на ладно место, односно во фрижидер.
Експертите препорачуваат 4°C како идеална температура за чување на која и да е, од овие две салати. Сепак, дури и ако ги чувате правилно, најдобро би било да ги изедете во рок од три дена. Причината за тоа е што по одредено време, особено ако ги чувате подолго време надвор од фрижидер, состојките ферментираат и се расипуваат. Не би било лошо дел од салатата да се стави во чинија, а потоа веднаш да се врати во фрижидер, за да не се расипе побрзо.