Домашен рецепт против ноќна кашлица: Направете природен лек од мед, ананас и банана

Дали спиете лошо во текот на ноќта и постојано се будите затоа што ве измачува кашлица која токму во текот на ноќта добива на интензитет? Дали сте пробале разни чаеви и сирупи, но ништо не помага?

Пробајте едноставен домашен напиток направен од мед, ананас и банана.

Но, зошто кашлицата толку често се појавува ноќе?

Причината е тоа што додека лежите, насобраните секрети почнуваат да ви течат низ грлото, поради што имате нагон да дишете низ устата.

Ова дополнително ја суши слузокожата на грлото и предизвикува кашлање.

За да можете мирно да спиете без постојана кашлица, ви донесуваме ефективно природно решение во форма на напиток направен од само неколку состојки.

Сѐ што ви е потребно за овој лековит напиток е банана, ананас, вода и малку мед.

Банана – овошје за добар сон

Бананата, која со причина е омилено овошје на многу луѓе, е одличен природен лек за добар сон.

Меѓу другото, содржи витамин Б6, кој делува на тој начин што ја претвора аминокиселината триптофан во серотонин.

Покрај доброто расположение, серотонинот е клучен и за регулирање на лачењето на мелатонин.

Ова овошје содржи и калиум и магнезиум, минерали кои ги релаксираат мускулите и го ублажуваат стресот и анксиозноста.

Ананас – содржи антиинфламаторен бромелаин

Во комбинација со бананата, ананасот е одлична природна помош за ноќна кашлица.

Благодарение на ензимот бромелаин, ова егзотично овошје има силно антиинфламаторно дејство.

Дополнително, токму бромелаинот од ананасот делува како силен муколитик, што значи дека помага да се разбие слузта што се формира во респираторниот тракт и на тој начин да се олесни дишењето.

Дури и ако страдате од астма или алергии, бромелаинот од ананасот ќе ви помогне и ќе ви го олесни дишењето.

Ананасот е богат и со есенцијални хранливи материи, вклучувајќи го и витаминот Ц, кој е важен за зајакнување на имунитетот, како и со калиум, магнезиум и бакар.

Мед – го смирува иритираното грло и ја потиснува кашлицата

Медот отсекогаш бил познат како природен лек за кашлица. Благодарение на неговата леплива, густа и влажна текстура, го премачкува грлото и го смирува и заштитува.

Истражувањата покажаа дека земањето мед пред спиење може да го потисне кашлањето кај децата во текот на ноќта (медот, се разбира, не се препорачува за деца под една година).

Напиток за ублажување на ноќната кашлица

Состојки:

1 банана
парче ананас
малку мед
вода

Приготвување:

Во тенџере стоплете вода. Излупете ја бананата и исчистете го ананасот. Ставете ги во блендер и матете додека не добиете пире. Истурете го во посебен сад, прелијте го со топлата вода, покријте го и оставете го да отстои околу половина час.

Кога ќе се олади пирето од ананас и банана, додадете малку мед и малку повеќе вода за да направите течен напиток. Испијте една шолја пред спиење.

Имајте предвид и дека причината за ноќната кашлица не мора да бидат настинка или грип.

Може да се работи и за астма, алергии или нешто посериозно. Ако вашата кашлица трае предолго и ништо не помага, сепак треба да проверите за што станува збор.

Дополнителни совети кои ќе ви помогнат

Спиење во подигната положба: за да се спречи истекување на секрет низ грлото, во случај на ноќна кашлица, дефинитивно се препорачува да спиете на повисока перница.

Топла бања: почестете се со топла купка пред спиење. Иако ладниот туш е генерално поздрав и за кожата и за циркулацијата, во случај на настинка придружена со ноќна кашлица, топлиот туш сепак е многу подобар избор – ќе го олесни дишењето и ќе ви ги отвори дишните патишта.

Навлажнувач: бидејќи сувиот воздух често е причина за иритација на грлото и за кашлање, добра идеја е да инсталирате овлажнител или дифузер во просторијата.

Што треба да избегнувате ако имате ноќна кашлица?

Избегнувајте млечни производи и преработена и пржена храна бидејќи можат да ги влошат симптомите на кашлица.