Бидејќи производството на какао драстично опаѓа, научниците се свртеа кон алтернативно растение кое е отпорно на климатските промени и кое би можело да ја спаси индустријата за чоколадо.
Екстремните временски услови ја загрозуваат иднината на плантажите со какао низ целиот свет, што претставува сериозна закана за иднината на индустријата за чоколади.
Затоа, научниците истражуваат други култури поотпорни на климатските промени, од кои би можел да се направи нов деликатес, пишува „Еуроњуз“.
Поголемиот дел од какаото (околу 60%) доаѓа од Западна Африка, од влажни земји како Брегот на Слоновата Коска и Гана, каде што топлите температури и обилни врнежи од дожд се менуваат со кратки сушни периоди.
Сепак, во текот на последните две години, производството на какао падна до 40%. Како резултат на тоа, цените на чоколадото се искачија на нивоа невидени од 1970-тите, а експертите предупредуваат дека светот без какао би можел да стане реалност веќе во 2050 година.
Постојат неколку фактори кои укажуваат на можно исчезнување на чоколадото. Претходните извештаи за ова ги обвинуваа нелегалното рударство на злато, стареењето на какао дрвјата, па дури и шверцерите на какао – но истражувањата сугерираат дека главниот виновник е сè поизразениот контраст помеѓу екстремните врнежи од дожд.
Од Институтот за клима и одржливост на Универзитетот Харвард велат дека чувствителноста на какаото на временските услови не е ништо ново, но климатските промени „го засилуваат интензитетот на обилни врнежи од дожд“ како што се зголемуваат температурите.
За секое зголемување на температурата на воздухот за еден степен Целзиусов, атмосферата може да задржи околу седум проценти повеќе влага, што доведува до пообилни и поинтензивни дождови.
– Основната физика е едноставна: потопла атмосфера содржи повеќе влага, што ги зголемува екстремните врнежи. Ова доведува до задржување на водата во почвата, ерозија и создавање услови погодни за развој на габични заболувања – објаснуваат истражувачите.
Поттикнати од овој колапс предизвикан од климата, научниците од Националниот универзитет во Сингапур се обидоа да најдат решение. Истражувачите се фокусираа на рогачот, растение отпорно на климатски промени кое се одгледува во Медитеранот и кое полека добива внимание како алтернатива на какаото. За разлика од какаото, рогачот напредува во топли, суви услови и бара многу малку вода. По печењето, ослободува уникатна арома што потсетува на какао, но неговиот вкус сè уште не се совпаѓа сосема.
За да го надминат тој проблем, тимот разви две техники за промена на вкусот на растението, користејќи ензими за подобрување на горчината и слаткоста.
Третманот со ензими е едноставен и чист метод кој бара минимална обработка, во споредба со другите методи кои вклучуваат груби хемикалии како што е хлороводородна киселина за подобрување на вкусот.
Со подобрување на вкусниот профил на рогачот, истражувачите велат дека овие техники би можеле да ги охрабрат слаткарите да го користат рогачот во прехранбени производи кои обично бараат какао, како што се чоколадни плочки, какао во прав, пијалоци од слад и други производи базирани на какао.
Доколку се усвои во голем обем, тоа би можело „значително да ја намали“ зависноста на индустријата за чоколадо од какаото.
– Нашето истражување не е само за реплицирање на вкусот на какаото – туку за диверзификација на состојките што ги користиме за да направиме алтернативи на чоколадото – вели Манфред Ку, прв автор на истражувачкиот труд.
– Свртувајќи се кон издржливи, климатски отпорни култури како рогачот, можеме да ѝ помогнеме на индустријата да се прилагоди на еколошките предизвици, а воедно да им дадеме на потрошувачите производ во кој ќе уживаат.