Борба против хемороидите: Кои намирници се пожелни, а кои е подобро да се избегнуваат?

Фото: Pexels
711

Одредена исхрана може да ги ублажи непријатните симптоми на хемороидите или дури да го спречи нивното појавување. Лекарите обично препорачуваат храна богата со влакна и многу течности

Според истражувањата, проблемите со хемороидите измачуваат меѓу 20 и 50 отсто од светската популација, но и покрај тоа, за оваа болест сè уште многу малку се зборува. Истражувањата покажаа дека речиси секој втор човек на возраст над 30 години ќе има проблем со хемороиди барем еднаш во животот, но луѓето обично го игнорираат овој проблем поради срам и непријатност.
Хемороидите се всушност вени кои се наоѓаат на крајот од завршниот дел на дебелото црево и се важни за регулирање и празнење на цревата, а проблемот настанува кога ќе почнат да отекуваат или да се зголемуваат. Тие можат да бидат надворешни или внатрешни, а некои од најчестите симптоми кои се јавуваат кај хемороидите се чешање или иритација во пределот на анусот, болка, оток околу анусот, крварење итн. Тие се главно безопасни и често се резултат на седечки начин на живот, недостаток на движење и лоша исхрана.

Најдобар начин за лекување на хемороидите е да го промените начинот на живот, пред сè, исхраната. Имено, одредена диета може да ги ублажи непријатните симптоми на хемороидите или дури да го спречи нивното појавување. Лекарите обично препорачуваат храна богата со влакна и многу течности. Порталот Webmd открива која специфична храна помага при оваа непријатна состојба, а ги наведува и намирниците кои луѓето со хемороиди треба да ги избегнуваат.

Намирници богати со растителни влакна

Важно е да се запамети дека постојат два вида влакна – растворливи и нерастворливи. Растворливите влакна се раствораат во вода и се добри за варење, а особено помагаат при запек. Нерастворливите влакна се исто така важни бидејќи помагаат храната да се движи низ дигестивниот систем и ја балансира хемијата во цревата.

Треба да консумираме 25-40 грама влакна дневно, но важно е да се запамети дека премногу растителни влакна одеднаш може да предизвикаат гасови и надуеност, па затоа е важно постепено да ги додавате во вашата исхрана.

Покрај тоа, многу е важно да пиете многу течности. Лекарите препорачуваат 8-10 чаши вода секој ден, особено за луѓе кои имаат проблеми со хемороиди.

Грав, леќа и јаткасти плодови
Мешунките, како гравот, боранијата и леќата се богати со влакна, па затоа треба што почесто да ги додаваме во исхраната. Јаткастите плодови како бадемите и оревите се исто така многу добар извор на влакна и здрави масти.

Житарки
Наместо бел леб и тестенини, храната со цели зрна е многу поздрав избор. На пример, интегралниот леб и кафеавиот ориз се одлични додатоци во исхраната. Житариците како овесот и јачменот се одличен извор на растворливи влакна, многу заситувачки и нискокалорични. Овесната каша е подобар избор за појадок од белиот леб, а овесните трици или пченични никулци може да се додаваат и во салати, супи, чорби или јогурт.

Овошје и зеленчук
Храната од растително потекло е секогаш добар избор и тешко е да се погреши. Повеќето влакна се кријат во кората, па затоа овошјето како круши, јаболка или сливи најдобро е да се јаде со кора. Постојат влакна, но и важни соединенија – флавоноиди – кои исто така можат да помогнат во ублажување на хемороидите. Добар извор на овие антиоксиданти се бобинките и зелениот лиснат зеленчук како кељ и брокула. Останатите зеленчуци, како краставиците и пиперките, освен влакна содржат и многу вода, па дефинитивно е добро да ги додадете во исхраната. И нутриционистите се согласуваат дека овошјето и зеленчукот треба да бидат во нашата чинија секој ден бидејќи се богати со влакна, но и со бројни други хранливи материи кои се важни за нашето целокупно здравје.
Која храна да се избегнува?
Храната со малку влакна може да предизвика запек (а со тоа и хемороиди), па затоа е најдобро да го ограничите внесот на таква храна. Лекарите истакнуваат дека луѓето со хемороиди треба да ги избегнуваат овие намирници:

Бел леб и печива
Млеко, сирење и други млечни производи
Месо
Преработена храна